這就是我的「那些年」

首先講句Sorry，馬生，要你失望喇…

因為呢篇唔可以算係影評。

以我呢個…

• 睇咗導演44本書(第45本响台灣人肉空運到港，11/19 pickup，Thanks 好同事Mandy!)
• 兼睇埋原著小說(其實係九把刀自傳?)
• 仲要睇咗套戲兩次嘅人

好明顯我可以話係九把刀嘅supporter(雖然我唔認係fans… =P)
基本上我寫D咩都係會有偏頗，冇可能好似坊間D影評人咁樣好認真客觀去寫呢套戲good or bad…

Anyway，我有嘢想寫，that’s the thing

正如上面所寫，呢套戲我睇咗兩次。

如果要compare兩次嘅不同，我可以講：

• 第二次氣氛好D，可能因為星期二張飛平D，而且早少少睇，D人冇咁累，所以多D反應
  另外就係有唔少人都坐到最後，變咗我同朋友都坐到最後，亦都睇埋最後嘅梗
  (導演你這樣惡搞新一代宅男女神不怕被婊嘛?)
• 第一次…simple, it’s more important for me

…我覺得睇完電影再睇小說會正D。
無他，當你已經透過N頁文字去咀嚼呢個99%真實1%幻想(?)嘅故事，腦海裏面已經透過final fantasy去想像每一幕嘅畫面，
之後再去睇真人演出嘅電影，總會有一點落差，而且應該感動嘅場口，睇書嗰陣已經感動過一次，
入到戲院再睇，自然驚喜及感動亦會少了一點…

不過將小說電影化亦始終有其好處。
一來可以「獨樂樂不如眾樂樂」，睇小說從來都係好個人嘅事，但睇電影就係一眾人嘅事，
縱使你係一個人入戲院(好在我睇兩次都係有伴)，其他觀眾亦會同你一齊互動，一齊笑，一齊喊，一齊俾掌聲，
加上套戲响小說以外加咗唔少笑料令到電影生色不少，同時亦佩服九把刀嘅分鏡同埋舖梗構思，
結果我要睇第二次先可以睇得晒所有嘅梗(可能我第一次睇嗰陣有點唔集中啦…haha)

有點可惜嘅係台灣同香港嘅文化始終有點差異，故此投入感始終差一點，
例如戲中所提及嘅NBA明星卡，我唔敢話香港冇，不過論普及性一定唔及龍珠同埋YES卡(當年我都儲唔少…)
另外有睇大量日系漫畫嘅話會有共鳴好多，較知名嘅當然有《Slam Dunk》、《龍珠》，
但係較冷門嘅…考考大家：

1. 開頭主角打牆，「你．已．經．死．了」…出自邊本書?
2. 第一屆自由格鬥賽，觀眾係咁叫「羚羊拳」，仲有主角集氣出嘅「輪擺式移位」…出自邊本書?

Hints係兩本書都係四個字，都係有個「拳」字…慢慢諗…

音樂方面算係做得幾ok，只能說$ony不是蓋的…當然，九把刀嘅詞亦應記一功，
由於我唔識音樂，所以comment ends here… =P

這首歌做ending，感覺良好

講少少題外話，以香港電檢處嘅一貫做法，呢套戲都幾多粗口，加上唔少嘅不雅用語、舉動，
正常係好大機會列為三級片，不過最終被評為2B，
係因為套片係國語(不過裏面好多Fxck喎…)？定係因為套戲台灣大賣？
還是一班評審員知道九把刀响台灣點樣力挽狂瀾？god knows…(P.S. 馬來西亞公映是十八歲以下不得入場觀看…)

最後十分鐘…既然導演話唔想响戲院以外被公開，所以我都唔寫太多喇…
個人覺得可以再做好D，如果唔係本身睇咗小說之後再推敲整個最後章節嘅脈絡/分鏡，
我諗我都未必get到呢段嘅重點…最少，未睇小說嘅她似乎唔太get到…
不過，我諗佢睇完小說之後，自然明白呢段戲嘅意義…或者咁樣仲好…

至於台灣HSBC一招借屍還魂平行時空廣告sell CS hotline…的確好橋…
同時我想講…如果個個女CS都有陳妍希咁正就好喇…咁我嗰接近3年CS生涯會更開心…haha
仲有，如果個個client都好似柯震東咁好人，你話呢個世界幾咁美好呢…
可惜發夢冇咁早，各位CS戰友，繼續努力呀!

對我而言，呢套戲最大嘅可惜之處唔係套戲本身有咩唔好，而係我沒有「那些年」，
同我一齊渡過「那些年」嘅老朋友(Oh Shit，要用老字喇…)，應該都知道我係終極進化版(?)嘅老曹，
對籃球呢種運動嘅熱愛程度簡直係Crazy，正因為咁我嘅中學生涯並冇好似故事裏面嘅主角們咁精采，
更加冇一個「我們一起追的女孩」(最少係冇我份)，不過有一樣嘢我同柯騰係似嘅，就係愛情上是膽小鬼…
我唔係冇喜歡嘅女孩，不過始終都只係放在心上，結果？當然係咩事都冇發生過…
呢種性格到而家都仲係咁…

講到呢度好似有D離題兼有D長氣，但係我仲有嘢寫…算，拆開兩篇寫…

最後一句，當《3 idoits》我可以rank佢2.9/3分，呢套戲…3分滿分，我俾2.95分。

雖然我唔反對一D講求視覺效果嘅電影拍成3D版本，不過我覺得3D電影未必係以下兩類人士杯茶：

• 

  一個人戴眼鏡+3D眼鏡就係咁樣...

  戴眼鏡人士
  雖然事實上戴住眼鏡睇3D電影其實都唔算好麻煩(以我睇1套3D電影嘅經驗)，
  不過都會感到唔舒服，因為個鼻托住兩副眼鏡其實真係幾重，
  而且好似廣告裏面所講嘅情節其實亦有機會發生…(只係冇咁誇張咁解啫)
  至於祼視3D電影嘛…
  要一個screen同時做到200幾個唔同角度(座位)都睇到3D效果難度太大喇
  我諗就算做到個result我諗都唔會太好囉…
• 單眼佬：
  如果一個人身體出現問題得番一隻眼睇到嘢，
  咁佢就已經唔駛睇任何3D電影，
  因為3D電影原理就係去欺騙兩隻眼睛嘅像差從而達致偽3D效果啊，
  得番一隻，點睇?

另外我亦都唔like一D戲有你冇理都拍做3D版本，
自己睇嗰套《變型金剛》已經唔算多3D鏡頭，
好在我係睇早場所以有平飛，如果唔係要我用過百銀睇佢我諗我一定會要求回水…

至於3D廢片中嘅經典應該都係當年由人人想睇去到後來連傻強都要粗口問候嘅《3D肉蒲團》，
好明顯3D電影當時淪為製片商呃錢嘅工具，以為咩都3D就掂…

結果呢?唔夠兩年就打回原形，似乎觀眾開始意識到荷包嗰張紅衫魚，
唔係用嚟入戲院睇一套冇露點亮點嘅3D電影，希望電影商亦都開始醒覺，真正賣座嘅電影，重點係內容，唔係3D啊!
(好內容亦正是我非常想睇响台灣超賣座嘅《那些年》嘅其一原因啊…快D到10/20啦…)

延伸閱讀：

3D電影利潤大跌，2D電影還是觀眾的最愛 | 科新聞 ＠ 癮科技

3條友用3個鐘去睇呢3兄弟表演，3分滿分，我俾2.9分

的確，呢套戲係近年難得既精采電影。

劇情方面可謂完美，幾乎每一個point都連結住劇情既另一個點
就連個角色名都唔放過(用Viru Shahastrabuddhe去諷刺印度教學制度似電腦病毒)
當中最精警既係Professor Virus嗰7分鐘半休息時間，同埋「自殺與謀殺」呢兩個位
可見劇本同導演真係好用心去舖排成套戲既內容

另外幾位主角既演出亦都做得幾好，當然最勁都係男主角Rancho，
由個樣同埋演技可以話係Tom Hanks加Mr. Bean既合體，
應搞笑時搞笑，要認真時亦都可以好認真，令到成套戲都生色不少。
(上完Wiki先知原來佢大有來頭)

另外睇完先知原來印度語已經夾雜咗好多英文，
係因為殖民時代統治得太耐嘛? god knows…

個人覺得整套戲唯一敗筆，就係兩段並非好重要既印度歌舞表演(尤其是第二段)，
雖然兩段舞都有D笑位，雖然呢D歌舞表演可謂印度電影既必然情節，
只係個人略嫌長咗少少，有D重覆同埋拖慢咗個節奏，所以要扣少少分

至於整套戲背後既意義，個人認為未必係要向印度既教育制度…
或者係全球唔少國家所推行既精英教育作出一種反諷
反而係去encourage大眾去做自己真正想做既事，從而獲得真正既快樂及成就

故事主角總算能夠做自己想做既事而獲得成就(包括嗰個「屁王」Chatur)，
但係現實生活呢? 要做到呢點真係唔容易…

最少我未做到。

背負著唔少既負擔同責任，始終令我無法嘗試去冒險，
幸好現時所做既都算係自己興趣之一(although not the most one)
否則我可能已經好似戲初嗰個高材生咁樣：I quit

BTW，能否有一日可以真正get the most wanted career?
…All is well, i hope so.

P.S. 正如圖片Caption所講，3分滿分我俾2.9分，未睇既話不妨花3小時入戲院笑吓，it worths.

幸好，星期一放假去左交學費(係呀!交學費，我半個身體準備back to school喇)，
總算的起心肝走去睇早場《Inception》…

同《志明與春嬌》一樣。
都係一個人睇。
都係Megabox。

如果一個人睇戲既次數同佢孤獨既程度係成正比的話，
咁我呢排都應該幾孤獨，haha

雖然套戲我係幾buy佢既「夢中夢」呢個concept，而且第一幕既雙重夢境真係做得幾正，
另外嗰個「夢境時間比真實時間長」既設定亦唔錯，夠realistic
(你有冇試過小睡半小時，但係發個夢好似過咗成個鐘?我就經常喇)
加埋成套戲冇咩位係好悶咁去講個故事設定(夢境既特點/限制等)，
呢樣嘢絕對要讚編劇/導演既功力

可惜另一重點「潛意識」/「植入記憶/思想」呢招已經見唔少
(sorry，可能因為我有睇九把刀既《都市恐怖病》系列)
所以唔算好suprise，而且成個故事同個中文Title唔match囉…
而最後一幕留條尾巴(圖騰不倒)亦唔算做得好好，雖然我都知佢係想留番個尾拍續集，
不過處理得唔係太好囉…

整體嚟講套戲係拍得唔錯，不過比起大家既comment…我會認為D comment令我高估咗套戲…

P.S.
近日煩緊寫網頁，仲要病病地…
希望下次寫blog唔會係9月中…

另外，能夠用電話開wordpress响坐車途中blogging真係爽到呢…
呢篇嘢大部份文字都係响坐車途中完成…正

個人較喜歡英文片名《Love in a puff》，因為如果齋睇中文片名，
你可能會以為係一套低級情慾片(你唔會睇到片名以為係恐怖片啩?)
當知道係千嬅與余文樂擔正，或者會諗: 「千嬅婚後大解放，余文樂變陳冠希?」
當然，事實唔係咁樣，而以上假設亦純屬自己搞笑only…

故事透過「禁煙」這話題，去編寫一個香港地每日可能出現十數個既愛情故事。
係，無論故事背景情節人物性格等等，都local到不能再localize，
諗計蛇王搵地方吹水，出席俾面派對沒事幹開電話自娛，SMS傳情都要睇吓係咪同台，
講外國語言總會變咗兩文三語(鄒凱光一句「ダメsmoking」成為了經典)
我諗呢D情節，唔係响香港住番三五七年係唔會知道箇中奧秘…

呢套片被電檢處評為三級片…原因?
相信係因為太多吸煙鏡頭，加埋完美地localize的中國粗口累事。
由此推論，香港社會，某程度上其實是一個三級社會…(咪睇錯，唔係三合會)
响禁煙前，香港哪裏不是煙霧瀰漫與問候聲不絕於耳?而禁煙後呢?
或許室內係smoke-free，不過一出室外，總會有一堆人响大廈出入口旁邊打邊爐…
另外電影中所熱爆既問候語句，响現實中則幾乎無處不在…

電檢處禁咗18歲以下人士入場睇呢部戲，但阻不了佢地响現實不斷地被耳濡目染…
或者網上世界會好一點，at least唔會煙霧瀰漫，不過請上高登討論區一趟，
你就會知道現時D後生仔係幾咁妙語連珠…

我有時都好佩服師兄鐵心可以响網上「暢所欲言」，
只係本人認為「唔係人人受得你呢套」，亦唔係人人受得到對話中夾雜問候語句，
所以响呢度，既是smoke-free，亦是近乎零問候語…

另外想講，志明與本人其實有D相似之處…
四眼仔，短髮，而且唔識點去對著心儀女生講「我喜歡你」(係!)
睇到志明嗰段自白，真係有D共鳴…不過我冇余文樂咁高大靚仔，同埋我唔食煙…

可惜最後都係miss咗片尾肥谷+千嬅既自白，還以為自己已經「看到最後」…失敗…

至於片中那招「i n 55!W !」，sorry，我沒這麼高招，亦暫時用不著…
不過亦想套用師兄鐵心的一句(果然係師兄)

當我說”How are you doing”… 其實I am missing you….