回想廿七年來，我經常被超越…

跑一百米，起步一剎，我經常佔據頭二名，但慢慢的被其他對手越過，
最終嘛…經常成為最後一個衝線的人

五年的校隊生涯亦差不多，由中三的必然正選+打足四十分鐘+得分王，到最後中七的第十二人

連我唯一一次參與八百米賽事亦是如此…被師弟追過的那刻，我只能苦笑

在工作上亦差不多，
在開始新工作時，我總會比大部份同事更容易適應新環境及新工作，
但到後來，當同梯各自取得成就時，我卻仍是原地踏步…

幸好，這些年來，日子總不算白過

最少，我領前及被超越的期間，我享受在前列的榮耀感，亦享受當被超越後可以當回一名普通人
因為我知道，當第一，要承受得起壓力及挑戰，我可不想當壓力煲…

當然，朋友的支持亦是非常重要…

今日，我收到52名朋友响FB留一句生日快樂(一個連我亦感到驚訝既數字呢)，
還有林夕小姐的一首BEason，thanks a lot。

對於27歲，本人希望達成幾個目標：

• 進修(已經plan左喇，準備交錢)，之後轉職
• 身體健康，所以要keep住做運動，
  同時為免雙眼受傷，故此配咗一副護目鏡，當係送俾自己既生日禮物
• 仲有其他就唔响度講喇…haha

突然想起龜兔賽跑，當人人亦說兔是驕傲致敗，但若從另一角度看，
兔領前了，選擇放棄最終的勝利而享受中段的閒適，那，兔又是否敗得一無所有?

或許，我就是那兔，haha

anyway， enjoy the life =P

P.S. 當大家以為我正日會好多人約嗰陣，其實係我冇人約囉
下年大家識做啦，hahahahaha

另外，能夠用電話開wordpress响坐車途中blogging真係爽到呢…
呢篇嘢大部份文字都係响坐車途中完成…正

個人較喜歡英文片名《Love in a puff》，因為如果齋睇中文片名，
你可能會以為係一套低級情慾片(你唔會睇到片名以為係恐怖片啩?)
當知道係千嬅與余文樂擔正，或者會諗: 「千嬅婚後大解放，余文樂變陳冠希?」
當然，事實唔係咁樣，而以上假設亦純屬自己搞笑only…

故事透過「禁煙」這話題，去編寫一個香港地每日可能出現十數個既愛情故事。
係，無論故事背景情節人物性格等等，都local到不能再localize，
諗計蛇王搵地方吹水，出席俾面派對沒事幹開電話自娛，SMS傳情都要睇吓係咪同台，
講外國語言總會變咗兩文三語(鄒凱光一句「ダメsmoking」成為了經典)
我諗呢D情節，唔係响香港住番三五七年係唔會知道箇中奧秘…

呢套片被電檢處評為三級片…原因?
相信係因為太多吸煙鏡頭，加埋完美地localize的中國粗口累事。
由此推論，香港社會，某程度上其實是一個三級社會…(咪睇錯，唔係三合會)
响禁煙前，香港哪裏不是煙霧瀰漫與問候聲不絕於耳?而禁煙後呢?
或許室內係smoke-free，不過一出室外，總會有一堆人响大廈出入口旁邊打邊爐…
另外電影中所熱爆既問候語句，响現實中則幾乎無處不在…

電檢處禁咗18歲以下人士入場睇呢部戲，但阻不了佢地响現實不斷地被耳濡目染…
或者網上世界會好一點，at least唔會煙霧瀰漫，不過請上高登討論區一趟，
你就會知道現時D後生仔係幾咁妙語連珠…

我有時都好佩服師兄鐵心可以响網上「暢所欲言」，
只係本人認為「唔係人人受得你呢套」，亦唔係人人受得到對話中夾雜問候語句，
所以响呢度，既是smoke-free，亦是近乎零問候語…

另外想講，志明與本人其實有D相似之處…
四眼仔，短髮，而且唔識點去對著心儀女生講「我喜歡你」(係!)
睇到志明嗰段自白，真係有D共鳴…不過我冇余文樂咁高大靚仔，同埋我唔食煙…

可惜最後都係miss咗片尾肥谷+千嬅既自白，還以為自己已經「看到最後」…失敗…

至於片中那招「i n 55!W !」，sorry，我沒這麼高招，亦暫時用不著…
不過亦想套用師兄鐵心的一句(果然係師兄)

當我說”How are you doing”… 其實I am missing you….

提起連線/連結…1) 終於入咗部Wireless Router，為乜?幫朋友整機時等我可以2機同時上網，一邊更新部維修機一邊用自己機上網，同埋為日後玩laptop/netbook做準備 2)視為mini-netbook的電話更新到Android 2.1，整體感覺良好，相機功能亦強化了…但點解會冇咗set WB架?還我白平衡設定呀…(上圖為Milestone所拍，當然PS裝甲是少不了)

早前收到一名朋友的MSN:「wei~我可否link你？」
最初看到這, 腦內只有「???」…
一問才得知朋友開了新blog，想將我的blog放在「連結」內
這可是讓我受寵若驚…(at least，現時那朋友的blogroll只有二人，我是其一)

這是因為朋友間沒太多的博客吧…(或許其實有不少，但高調出post的只有幾人…?)

但，我想相信朋友的決定是因為佢視我為好友…這樣我可以「自我感覺良好」…

突然想起自己的網絡生涯原來亦不短，例如當年icq還在98ver.時已在玩，
(BTW，大家還記得自己的ICQ#嘛?我的是6字頭8位數，可算是半元老級…)
其後的MSN/forum/FB，還有搬家數次的blog等…

講講吓，好似講到自己好宅咁…算，「我很宅，但我很XX」(請自行代入二字)

還有，發現之前剖份有RSS的blog响reinstall OS之後忘記link回，
結果就此錯失了好多好post(家誠，sorry喔)，所以近日執正了，
同時响blog內加回部份好友既Link，雖然被提點漏了蘇娜…(原諒我呀大作家)

林夕小姐說：(link)慢慢會加上去，
但願那主動link我的朋友，其link會慢慢加上去，
亦願我這裏會慢慢加上去，當然我這blog能於更多博客的blogroll內「生存」會更好…

不得不承認，Eason的確很神…

在群眾表示佢把聲傷咗，應該好好休息既時候，
但佢仍然堅持表演，由最初幾首用唔到假音，
之後一句「我已經慣咗聲沙，係有人唔慣啫」，
繼續又唱又叫，不斷地牽引觀眾情緒，讓自己及全場皆進入忘我境界…

你可以話佢是在自殘，亦可以話佢懂得及時行樂(搵錢?個人認為いいえ)…
最重要係，佢知自己做緊乜，亦知道佢應該做D乜…
單是這點，你需要佩服佢既勇氣及精神，
神，或許就是需要當一般人不會/不敢做的事…

83年出生，10年來，錯過了家駒，還好，再16年後，沒有錯過Eason。
與林夕小姐+分身及朱小姐一齊用$150換來這經歷，marvelous

演唱會其間曾經魂不附體地回想某些過去與現在，
其後看回林夕小姐提及林夕的「富士山愛情論」，
再回想自己過去唯一正式既戀情，與及近日一名朋友既說話…
「喜歡一個人　就像喜歡一個風景　風景再美　也沒法帶走」
「我只是想我喜歡的人開心…」
「最愛的， 更應放手…不一定要擁有」

嗯，也許如此…而，現在那個「她」呢?
還未感覺到是何種情感…
anyway，慢慢地拿捏該如何面對這感覺…

題外話，朋友經常說我FB上甚多女生留言，又話我多女性朋友…
我想講，點多都好，應該都唔夠鐵心多啩?
單是佢每次語出驚人都引來大堆美女留言，
就知我同佢根本就唔同「呢」…要追趕，我想還欠十多年功力呢…

BTW，我喜歡在網絡上可以產生幾乎無限可能性既互動，
由最初一首BGM慢慢認識3名女孩子，甚至一齊睇concert，
或是因為工作無聊頂透而鑽forum出post，認識同病相憐者，得閒搞gathering，
甚至因同一興趣而經歷一次又一次山間地獄團(雖然已幾近解散)，
而這正是我可以憑一部電腦(近日退化到用電話)已可打發時間…
在這裏，我找到另一個生存空間，找到了另一個我…a myself so-called NoGravity.

這…是宅嘛?i don’t think so…
所以，別要再說我遲早變宅男了…(最多說我遲早人格分裂好了，haha)

P.S.
突然想起自己曾幾何時發白日夢想寫一本科幻小說，
其中一句對白大概意思…
「神與魔，其實是一體兩面，問題是，你我怎樣去看」
Eason這表演，是神為世人，還是入魔自毁?
而愛一個人，又會否在他人眼中是一種傷害?
G.O.D. knows? D.O.G. seems will not know.

老實講，好hea又算不上，因為每日都係揹住2機3鏡一閃，
每日都係晨早就起身(最早一日係8點唔夠起身)，有幾日都係趕尾班車返酒店，
加埋不斷既上錯車兜錯路等等…

幸好，成個trip都算係非常enjoy，精神總算叉足電，
不過就如林夕小姐所言，肉體卻像俾人打了一身一樣咁累…

anyway，回到香港，又開始忙碌既生活，先係星期六日行山，
加埋要處理900+張旅行相，之後就繼續返工放工…

Phyllis，記得出咗個旅行post唔准鬧呀，hahahaha

P.S. 在此補回，祝分身生日快樂。