另外，能夠用電話開wordpress响坐車途中blogging真係爽到呢…
呢篇嘢大部份文字都係响坐車途中完成…正

個人較喜歡英文片名《Love in a puff》，因為如果齋睇中文片名，
你可能會以為係一套低級情慾片(你唔會睇到片名以為係恐怖片啩?)
當知道係千嬅與余文樂擔正，或者會諗: 「千嬅婚後大解放，余文樂變陳冠希?」
當然，事實唔係咁樣，而以上假設亦純屬自己搞笑only…

故事透過「禁煙」這話題，去編寫一個香港地每日可能出現十數個既愛情故事。
係，無論故事背景情節人物性格等等，都local到不能再localize，
諗計蛇王搵地方吹水，出席俾面派對沒事幹開電話自娛，SMS傳情都要睇吓係咪同台，
講外國語言總會變咗兩文三語(鄒凱光一句「ダメsmoking」成為了經典)
我諗呢D情節，唔係响香港住番三五七年係唔會知道箇中奧秘…

呢套片被電檢處評為三級片…原因?
相信係因為太多吸煙鏡頭，加埋完美地localize的中國粗口累事。
由此推論，香港社會，某程度上其實是一個三級社會…(咪睇錯，唔係三合會)
响禁煙前，香港哪裏不是煙霧瀰漫與問候聲不絕於耳?而禁煙後呢?
或許室內係smoke-free，不過一出室外，總會有一堆人响大廈出入口旁邊打邊爐…
另外電影中所熱爆既問候語句，响現實中則幾乎無處不在…

電檢處禁咗18歲以下人士入場睇呢部戲，但阻不了佢地响現實不斷地被耳濡目染…
或者網上世界會好一點，at least唔會煙霧瀰漫，不過請上高登討論區一趟，
你就會知道現時D後生仔係幾咁妙語連珠…

我有時都好佩服師兄鐵心可以响網上「暢所欲言」，
只係本人認為「唔係人人受得你呢套」，亦唔係人人受得到對話中夾雜問候語句，
所以响呢度，既是smoke-free，亦是近乎零問候語…

另外想講，志明與本人其實有D相似之處…
四眼仔，短髮，而且唔識點去對著心儀女生講「我喜歡你」(係!)
睇到志明嗰段自白，真係有D共鳴…不過我冇余文樂咁高大靚仔，同埋我唔食煙…

可惜最後都係miss咗片尾肥谷+千嬅既自白，還以為自己已經「看到最後」…失敗…

至於片中那招「i n 55!W !」，sorry，我沒這麼高招，亦暫時用不著…
不過亦想套用師兄鐵心的一句(果然係師兄)

當我說”How are you doing”… 其實I am missing you….

今次係我第二次入演藝睇話劇，另外仲有一次係去文化中心。
感覺上去演藝睇好過去文化中心，可能係因為座位問題，
兩次去演藝都係坐較高0既位，場景前後都睇得一清二楚，
而且唔like文化中心太大，有一種空洞感…
BTW，今次團體飛居然有得坐中間位，簡直係一流!

故事由小說改篇，主要寫香港人0既情，老實講，睇番70-80年代電視劇，
呢類型0既題材都唔少，而今次呢套話劇以飯店為中心，以「食」為引子，
故事性算係唔錯，雖然部份情節感覺有點薄弱(後述)，但係整體都做得ok!
起碼將一本小說0既內容能夠濃縮到150分鐘，又唔會令故事情節甩頭甩尾，
真係唔可以要求咁高。呢一點，編劇同導演等等都已經交足功課。

萬綺雯做女主角鄧雯，可謂呢套話劇最大selling point。why?
樣貌娟好，身型均勻，加上豐富演出經驗，雖然未算完美，
但係已經幾近「品質保證」。今次飾演事業型女性仍然係一貫水準，
要強勢有強勢，要軟弱有軟弱，無乜挑剔，
個人認為雖然未算有咩突破，不過總比「無貨交」好。

講起Happy Man，你會諗起乜?
我會諗起Drum Mania名曲《HappyMan》，同埋0個隻小丑…haha
講番話劇，鄧景輝演畫家HM(Happy Man簡寫)，一口中英夾雜0既「廣東話」，
可謂現時港人寫照，試問現時有邊個土生土長0既香港人，尤其是年青人，
會100%時間都係只用中文同朋友or業務夥伴談話?就算係身為CS，
我同客戶講call都係中英夾雜，呢點已經成為港人0既習慣…
要扮演一個樂觀、隨性0既畫家，佢都算係演得唔錯，
但係佢好似係故事裏面0既一個旁觀者，經常俾人一種「置身事外」0既感覺，
呢點可能係因為佢要做埋頭尾場「旁白」0既關係，不過結局交待故事時，
佢作為「男朋友」去交待女主角同丈夫復合0既一段，實在令人unbelivable，
我諗唔會有一個男人真係能夠咁豁達囉?although呢個係故事所需，
但呢點會令我覺得HM呢個角色唔夠真實…

鄧健泓歌影視三棲，今次佢做話劇演三仔鄧哲，個人認為佢做話劇最好。
做歌手，而家要有歌喉，但係更重要係個樣同埋觀眾緣，呢兩點，Patrick弱0左D。
演電視劇同電影，對演技要求會較高，細微0既表情動作亦要一絲不苟，
因為好多時Close Up大大個頭show0向個screen，唔係咁易交到貨…
而主持而家要識執生同埋識搞笑，呢樣佢似乎未夠功力，唔信?
上網睇番一集《耳分高下》，你就會知佢同拍檔哈林0既功力差幾多重天。
咁話劇呢?話劇對肢體動作0既要求會較多同高，表情就可以誇張一點，
似求佢0向呢方面0既表現都唔錯，只係有D轉接位0既反應轉變未夠圓滑，
例如有一幕講重遇老爸，由激動到因為外人出現而要收火同埋閃人，
0向呢一幕未算做得完美，有點生硬，不過其他位都做得對辦，
佢不妨可以0向呢方面繼續發展。

大仔鄧政(林英傑飾)同鳳萍(梁翠珊飾)呢一對，平凡得0黎帶著不少笑料，
而且林英傑演一名固執而不善表達自己0既「一家之主」，做得恰如其份，
雖然未算搶鏡，但都算係芸芸角色當中演得比較成功0既一個。
不過，0個一幕邂逅回憶，箇中橋段係真有其事?還是只係電視劇橋段照辦煮碗?
一個個大問號出現…

由新人黃鎧晴飾演0既Fiona，應該係成套劇最突出0既一位。
呢點並唔係因為佢演得特別好，而係因為佢0個一0下「洗頭水廣告式撥頭髮」，
我諗觀眾就算唔記得其他0野，都會記得呢一個shot(甚至係shock)，
為新人造勢上位，佢呢次算係幾成功，而演技方面，對新人當然唔會有咩高要求，
個人認為已經合格有餘，只係嫌誇張0左一D，雖然係話劇，但係可以收歛一0下…

另外我曾經作出一個大膽假設：Fiona就係三兄妹0既老爸與情婦所生下0既私生女。
令我有呢一種諗法，最主要原因係因為第一幕佢出現0向靈堂，
之後記者一到就極速閃人，到中段搵埋拍檔去飯店門口拍片但係唔成功，
直至中場休息時亦冇交待佢0既真正身份同職業，
就算佢有約到三仔去約會話自己係DJ，亦難免令人懷疑佢係講大話引鄧哲「落搭」…
目的為何?報復。可能佢0地老爸又係生完個女(Fiona)之後走0左佬，
所以藉金梅0既死搞爭產風波做新聞，再引誘鄧哲令佢能夠接近鄧家，
再慢慢搞破壞等佢0地家無寧日(下刪數百字)…
雖然最後一招「出國讀書」為Fiona同鄧哲呢條線埋尾，令我0既假設基本上唔成立，
但係有時真係要佩服自己0既幻想力…hahahaha

不得不提李楓所演0既金梅，要演7-80年代含辛茹苦0既慈母角色，
當然難唔到呢D老前輩，表現可謂無可挑剔，雖然唔算出鏡好多，
主要都係同小演員做對手戲，但係令人印象深刻，果然係「薑越老越辣」。
而一眾小演員0既演出亦令人滿意，或者會從中發掘到一D未來之星都唔奇。

個人認為道具設計係呢套劇幾成功0既一part，雖然有人唔同意(見延伸閱讀)，
但係要巧妙運用場景同道具0既配合，加埋觀眾0既投入感同幻想力，
令同一組場景可以變做靈堂、飯店內外、西餐廳、老人院等等，真係少D諗頭都唔得。
當然，我亦認為場景跳得太密，影響到故事流暢度，不過整體而言已經係中上水準。

音效搵0黎CMM主腦林子揚，不過不失，可能因為自己做CS，日日聽call，
搞到自己對聲音敏感度下降得好犀利…俾唔到太「到」0既comment。

正如之前所講，場景跳得太多，而且本身支線亦都唔少，令到一D場口變得薄弱，
其中個人認為鄧哲同Fiona呢一條支線可以加強一D，現時總覺得呢段關係好零碎，
未有足夠材料去令呢條線變得完整…

睇完戲同朋友講起，話唔知會唔會有得即時買番原著小說，不過我就不感興趣。
就好似我睇完漫畫《20世紀少年》，令我對電影版本冇乜興趣(近期會上第二章)，
而《Harry Potter》我亦係睇電影版only，一本小說都買0黎睇(不管中英版本都係)，
要令我睇完話劇會有興趣睇番原著，我諗要我對故事情節好有興趣至得，
好可惜，《品香飯店》未係。

整體0黎講，呢套話劇表現中規中矩，加埋用$50超平價去睇，抵!

延伸閱讀：
“品香飯店”舞台劇觀後感 – 傻瓜頭 Blog – 傻瓜頭 – Yahoo! BLOG
─web surfing中搵到0既一個小評，不妨睇睇
A Taste To Remember─官方網頁

題外話：
近日睇緊Zola本《范淑雅》，閃過將呢本小說改篇做話劇，
不過似乎最多都只係可以改篇做電影，Why?自己買本啦…
雖然我個人認為Zola下次寫小說不妨寫得soft一點…haha