2010年8月23日，菲律賓一名前警察挾持旅遊車要求復職，最終以最壞的方式結束，
8名香港人連同鎗手死亡…(圖片來源：美聯社)

一時間，在香港的市民團結一致，不斷留意新聞的最新消息，
Facebook內出現不同的群組，為遇事者祈禱，送上祝福，
亦有不有人轉載不同圖片及連結，批評菲律賓當局處事不當，或是向一些冷血同胞發出怒吼…

我唔敢講我係對呢件事極度關注，最少我唔打算响呢度或者面書向當局發出控訴，
亦唔打算花大量時間向嗰D對事件感到高興既「人」身上，
但，最少，呢段文字係我寫blog以嚟打字期間心情最沉重既一篇…

經過兩日嚟不同既消息，或者大家對整件事亦有唔同睇法，在我而言…

• 鎗手既真實動機仍然不明(個人唔認為佢只係想復職咁簡單)，但呢個已經唔重要，因為佢已經被槍殺/自殺…
• 當地警方既辦事能力是值得商榷，但或許我哋唔好用香港既標準去分析佢哋既處事手法，
  或者佢哋呢班特種部隊已經真係警隊既精英…當然，如果事情屬實，
  咁我諗大家日後去菲律賓之前真係要諗清楚少少
• 對於部份死者係咪sniper誤殺，我認為有必要查明，最少，還鎗手、死者及其家屬一個明白
• 有人話成件事背後涉及當地貪污問題，所以出現「滅口」一說，客觀D諗其實有可能，
  但事情要查過至知(雖然我認同有網民所講如果屬實根本唔會俾外間查到)，
  唯有寄望呢個世界既「公義」能夠响呢一刻出現
• 對於遇事者，我做唔到D乜，只能願生者堅強，願死者安息

這件事，是意外，是不幸，是悲劇。

是劫者癲狂?是當局愚蠢(甚或是人家所說的陰謀論)?

一切一切，已於鎗聲中結束…

人總需要勇敢生存，願你我及遇事生還者能夠積極面對未知的明天。

延伸閱讀：

一個曾踏足菲國的人：對菲律賓人質事件之我見(Uwants)
BBC 中文网 – 分析評論 – 綜述：港人憤怒回應菲律賓慘案

幸好，星期一放假去左交學費(係呀!交學費，我半個身體準備back to school喇)，
總算的起心肝走去睇早場《Inception》…

同《志明與春嬌》一樣。
都係一個人睇。
都係Megabox。

如果一個人睇戲既次數同佢孤獨既程度係成正比的話，
咁我呢排都應該幾孤獨，haha

雖然套戲我係幾buy佢既「夢中夢」呢個concept，而且第一幕既雙重夢境真係做得幾正，
另外嗰個「夢境時間比真實時間長」既設定亦唔錯，夠realistic
(你有冇試過小睡半小時，但係發個夢好似過咗成個鐘?我就經常喇)
加埋成套戲冇咩位係好悶咁去講個故事設定(夢境既特點/限制等)，
呢樣嘢絕對要讚編劇/導演既功力

可惜另一重點「潛意識」/「植入記憶/思想」呢招已經見唔少
(sorry，可能因為我有睇九把刀既《都市恐怖病》系列)
所以唔算好suprise，而且成個故事同個中文Title唔match囉…
而最後一幕留條尾巴(圖騰不倒)亦唔算做得好好，雖然我都知佢係想留番個尾拍續集，
不過處理得唔係太好囉…

整體嚟講套戲係拍得唔錯，不過比起大家既comment…我會認為D comment令我高估咗套戲…

P.S.
近日煩緊寫網頁，仲要病病地…
希望下次寫blog唔會係9月中…

回想廿七年來，我經常被超越…

跑一百米，起步一剎，我經常佔據頭二名，但慢慢的被其他對手越過，
最終嘛…經常成為最後一個衝線的人

五年的校隊生涯亦差不多，由中三的必然正選+打足四十分鐘+得分王，到最後中七的第十二人

連我唯一一次參與八百米賽事亦是如此…被師弟追過的那刻，我只能苦笑

在工作上亦差不多，
在開始新工作時，我總會比大部份同事更容易適應新環境及新工作，
但到後來，當同梯各自取得成就時，我卻仍是原地踏步…

幸好，這些年來，日子總不算白過

最少，我領前及被超越的期間，我享受在前列的榮耀感，亦享受當被超越後可以當回一名普通人
因為我知道，當第一，要承受得起壓力及挑戰，我可不想當壓力煲…

當然，朋友的支持亦是非常重要…

今日，我收到52名朋友响FB留一句生日快樂(一個連我亦感到驚訝既數字呢)，
還有林夕小姐的一首BEason，thanks a lot。

對於27歲，本人希望達成幾個目標：

• 進修(已經plan左喇，準備交錢)，之後轉職
• 身體健康，所以要keep住做運動，
  同時為免雙眼受傷，故此配咗一副護目鏡，當係送俾自己既生日禮物
• 仲有其他就唔响度講喇…haha

突然想起龜兔賽跑，當人人亦說兔是驕傲致敗，但若從另一角度看，
兔領前了，選擇放棄最終的勝利而享受中段的閒適，那，兔又是否敗得一無所有?

或許，我就是那兔，haha

anyway， enjoy the life =P

P.S. 當大家以為我正日會好多人約嗰陣，其實係我冇人約囉
下年大家識做啦，hahahahaha

與平日有點不一樣，他沒有開面譜了解朋友最新動態(而且他從不偷菜)，
亦沒有到論壇與網友聊天，反而到了已經塵封久遠的柵架，
輸入一個熟悉，同時陌生的login，用滑鼠在視窗上打了數圈，
之後找回那個subscription，不由自主地指著一個更熟悉，同時更陌生的名字…

最終，他還是對自己坦白，一探這人有甚麼新事情。
Browser刷新到另一個page，看到最新的update，”Monday, September 07, 2009″
雖然已經不是第一次看到這幾張照片，但CRT屏幕前的他還是有一點「感覺不良好」，
除了因為點點的後悔及內疚外，還有的是，他對這人的認知，已停留在2009年9月7日為止…

「近一年來，這人還好嗎?」
「已找到真正的倚靠者嗎?」
「是否已經成為出色的照料者?」

一堆沒有答案的問題在他腦中打轉，雖然要知道答案，
他只需在電話上按下幾個數字便可得知，但他沒有這樣做。

也許，他沒勇氣再去跟這人談話，怕氣氛尷尬，或是怕會再傷害到這人…
他或許更不想當電話接通後，是一名陌生人的聲音，甚至是「你所打既電話號碼已經停止使用…」

他害怕這通電話會使二人的最後交集亦中斷…maybe…

你在我記憶旅行　每步也驚心
跟你踏過許多足印　舍不得轉身
你贈我太多見聞　拿不走的熱吻
多努力放低　偏不會忘記　苦戀紀念品
純屬過路風箏　不懂得愛別人

• 關於$ony的NEX-5，老實講，有少少中毒，而且本身打算寫篇嘢about it，
  不過開咗個頭擺咗半個月，而家決定放棄唔寫，因為gadget呢家嘢update得太快，
  轉頭三叔又整部EX1，既然要等用緊部機幾乎打柴先會考慮轉會，
  倒不如等真係入手先至寫篇嘢「歌頌」好過…
• 近日又做回老本行，投身freelance IT行列，砌機寫網頁同埋剪片，
  仲要大部份係FOC(即係免費)，真係…(朋友，見字識做啦)
• 想搵多D錢，可能遲吓會去學寫flash…不過coming up又話html5…點算?
• 正研究將gallery同blog合併既可能性…不過仍有大堆問題要處理…
• blog既theme可能會再執，處理完freelance工作就係時候開工…
• 近日迷上玩NBA2K10…異常的沉迷…
• 居然唔記得去睇葉問2，或者係時候租DVD或者去BT…
• 幾時先好天呀?好想去行山同埋去鐵路博物館呀…
• 我必須承認我係太愛自己，呢點從我寫blog既手法可見一斑…
  要改，需要時間…慢慢來…不過，個blog既內容就唔會點改喇…haha