這一天，我彷彿看到末世紀煙花(?)

2012年，似乎真係好似朋友所講「流年不利」…

1. 除夕去咗IFC倒數睇煙花，好多人，好熱鬧，大家都好High(再一次多謝朋友邀請)
   可惜，識唔到人(當然係講緊靚女)，而且有一種寂寞嘅感覺，一種…身處人山人海，但係同alone冇分別嘅感覺…
   同其他人無關，只係自己無法投入個環境…灰
   到底點樣可以唔再有呢種feel…?still no answer yet…
2. 聖誕過後開始作病，結果頂唔順星期三去睇醫生，而家仲咳緊…
   嚟緊星期六日仲要去飲去gathering做義工…要快D好番至得
3. 前兩日打2012年第一次波，同對手(唔識嘅)火星撞地球，結果佢就爆咗眼角要call白車(sorry for that)，
   我就撞爆咗個咀，加埋崩咗門牙少少，雖然問咗朋友意見之後唔駛補牙(因為補完都會好快甩)，
   但係都要去做檢查俾牙醫磨一磨佢，個荷包仲傷過爆眼角位仁兄…

希望過埋呢個禮拜會好運D啦…

2012年，願大家都Dreams Come True

最後一天，明天就開始最後一年。

雖然我係近乎無神論者，同時亦都唔相信下年就係世界末日(就算係又點，咪又係等死，唔諗好過)
不過，下年的確是最後一年，距離三十而立嘅最後一年。

即係話，要玩，要癲，都係最後一年。(突然醒起都幾年冇去Ocean Park)

looking back今年，好多事情發生，好多新經歴，例牌地整理一下先：

• 第一次自己出國旅行，雖然連個天都玩我，亦都搵唔到正妹，anyway，難得嘅經驗
• 做咩都二奶三奶四奶命嘅我，今年搭單拎咗個校友盃冠軍，嚟緊呢年繼續搭單，各位努力！
  我會做好我呢個bench warmer架喇
• 突破性地返同一份工超過兩年(其實上年已經破咗記錄)，雖然最後都係捱唔到三年，
  不過識到一班勁nice嘅同事同老細(多謝Calvin今晚invite我去count down party等我唔駛做宅男)
  希望大家可以keep in touch，我仲等緊大家結婚之後D利是架
• 總算搵到條path俾自己去行(雖然唔係the most favorite)，不過，keep walking and searching for the aim
• 提起結婚，今年收到唔少粉紅炸彈，當中最touching嘅都係馬力同天使呢Pair，
  始終都係幾乎睇住佢哋相識相戀到結婚，始終要响同一個office去create一對夫婦真係唔容易，
  真心希望佢哋白頭到老(當然其他結咗婚同埋將會結婚嘅都係啦)
• 响有驚無險之下終於完成咗個Pro-Dip，之後就planning讀學位，雖然暫時都係planning而未有實際行動
  anyway，正如前面所講，最後一年，呢一年，會係決定性嘅一年
• 年初(定年中？唔記得咗)訂立嘅freelance目標總算超額完成，多謝各方好友係咁俾機會我搵外快，
  希望下年「生意額」可以繼續上升，hahahahahaha
• 作為朋友口中嘅「潮人指標」，今年嘅新玩具數字的確唔少…
  腳架x2電話x2鏡頭x2波鞋又x2…仲有買咗件買嚟好似有點浪費嘅Gortex…
  雖然我唔認係潮，不過今年真係駛錢駛得幾兇狠，正因為咁，聖誕俾自己一個message：
  「活著多好，不需要靠物証」
• 今年喜歡過一個女生(嚴格嚟講係兩個？)，雖然最終都係自動放棄，不過，總算再確立自己係not ready…

本來仲有好多嘢未寫，不過，time’s up，一切未了嘅carry forward去下年繼續。

嚟緊一年，繼續向前走，盡量唔再think -ve act +ve，而係think +ve act +ve
共勉之。

Hapi New Year~

這就是我的「那些年」

首先講句Sorry，馬生，要你失望喇…

因為呢篇唔可以算係影評。

以我呢個…

• 睇咗導演44本書(第45本响台灣人肉空運到港，11/19 pickup，Thanks 好同事Mandy!)
• 兼睇埋原著小說(其實係九把刀自傳?)
• 仲要睇咗套戲兩次嘅人

好明顯我可以話係九把刀嘅supporter(雖然我唔認係fans… =P)
基本上我寫D咩都係會有偏頗，冇可能好似坊間D影評人咁樣好認真客觀去寫呢套戲good or bad…

Anyway，我有嘢想寫，that’s the thing

正如上面所寫，呢套戲我睇咗兩次。

如果要compare兩次嘅不同，我可以講：

• 第二次氣氛好D，可能因為星期二張飛平D，而且早少少睇，D人冇咁累，所以多D反應
  另外就係有唔少人都坐到最後，變咗我同朋友都坐到最後，亦都睇埋最後嘅梗
  (導演你這樣惡搞新一代宅男女神不怕被婊嘛?)
• 第一次…simple, it’s more important for me

…我覺得睇完電影再睇小說會正D。
無他，當你已經透過N頁文字去咀嚼呢個99%真實1%幻想(?)嘅故事，腦海裏面已經透過final fantasy去想像每一幕嘅畫面，
之後再去睇真人演出嘅電影，總會有一點落差，而且應該感動嘅場口，睇書嗰陣已經感動過一次，
入到戲院再睇，自然驚喜及感動亦會少了一點…

不過將小說電影化亦始終有其好處。
一來可以「獨樂樂不如眾樂樂」，睇小說從來都係好個人嘅事，但睇電影就係一眾人嘅事，
縱使你係一個人入戲院(好在我睇兩次都係有伴)，其他觀眾亦會同你一齊互動，一齊笑，一齊喊，一齊俾掌聲，
加上套戲响小說以外加咗唔少笑料令到電影生色不少，同時亦佩服九把刀嘅分鏡同埋舖梗構思，
結果我要睇第二次先可以睇得晒所有嘅梗(可能我第一次睇嗰陣有點唔集中啦…haha)

有點可惜嘅係台灣同香港嘅文化始終有點差異，故此投入感始終差一點，
例如戲中所提及嘅NBA明星卡，我唔敢話香港冇，不過論普及性一定唔及龍珠同埋YES卡(當年我都儲唔少…)
另外有睇大量日系漫畫嘅話會有共鳴好多，較知名嘅當然有《Slam Dunk》、《龍珠》，
但係較冷門嘅…考考大家：

1. 開頭主角打牆，「你．已．經．死．了」…出自邊本書?
2. 第一屆自由格鬥賽，觀眾係咁叫「羚羊拳」，仲有主角集氣出嘅「輪擺式移位」…出自邊本書?

Hints係兩本書都係四個字，都係有個「拳」字…慢慢諗…

音樂方面算係做得幾ok，只能說$ony不是蓋的…當然，九把刀嘅詞亦應記一功，
由於我唔識音樂，所以comment ends here… =P

這首歌做ending，感覺良好

講少少題外話，以香港電檢處嘅一貫做法，呢套戲都幾多粗口，加上唔少嘅不雅用語、舉動，
正常係好大機會列為三級片，不過最終被評為2B，
係因為套片係國語(不過裏面好多Fxck喎…)？定係因為套戲台灣大賣？
還是一班評審員知道九把刀响台灣點樣力挽狂瀾？god knows…(P.S. 馬來西亞公映是十八歲以下不得入場觀看…)

最後十分鐘…既然導演話唔想响戲院以外被公開，所以我都唔寫太多喇…
個人覺得可以再做好D，如果唔係本身睇咗小說之後再推敲整個最後章節嘅脈絡/分鏡，
我諗我都未必get到呢段嘅重點…最少，未睇小說嘅她似乎唔太get到…
不過，我諗佢睇完小說之後，自然明白呢段戲嘅意義…或者咁樣仲好…

至於台灣HSBC一招借屍還魂平行時空廣告sell CS hotline…的確好橋…
同時我想講…如果個個女CS都有陳妍希咁正就好喇…咁我嗰接近3年CS生涯會更開心…haha
仲有，如果個個client都好似柯震東咁好人，你話呢個世界幾咁美好呢…
可惜發夢冇咁早，各位CS戰友，繼續努力呀!

對我而言，呢套戲最大嘅可惜之處唔係套戲本身有咩唔好，而係我沒有「那些年」，
同我一齊渡過「那些年」嘅老朋友(Oh Shit，要用老字喇…)，應該都知道我係終極進化版(?)嘅老曹，
對籃球呢種運動嘅熱愛程度簡直係Crazy，正因為咁我嘅中學生涯並冇好似故事裏面嘅主角們咁精采，
更加冇一個「我們一起追的女孩」(最少係冇我份)，不過有一樣嘢我同柯騰係似嘅，就係愛情上是膽小鬼…
我唔係冇喜歡嘅女孩，不過始終都只係放在心上，結果？當然係咩事都冇發生過…
呢種性格到而家都仲係咁…

講到呢度好似有D離題兼有D長氣，但係我仲有嘢寫…算，拆開兩篇寫…

最後一句，當《3 idoits》我可以rank佢2.9/3分，呢套戲…3分滿分，我俾2.95分。

這張"t_hero.png"源自蘋果官網，的確，He is the hero for Apple...maybe for you and me also

如果你係一名蘋果迷，身處香港嘅你或應該感到慶幸，
最少我哋都有一間正式嘅Apple Store，然後可以俾你去獻花去悼念呢位劃時代嘅天才。
一切，就好似美國蘋果迷响紐約所做嘅一樣。

一代天才到底真係等到星期三iPhone 4s (iPhone for Steve?)正式推出先至瞑目，定係好似有人咁話其實早已離世，等到而家先公佈?
你問我，我當然想係前者…至於事實為何?如果Mrs. Jobs唔想講，咁，let it go啦…

回想起自己對Apple嘅第一印象係：
198x年，電視賣緊第N代Mac機廣告，當時Apple仲係用緊七彩logo，不過當年嘅Mac應該唔關Steve事…
之後十多年幾乎對Apple，甚至Steve Jobs都不聞不問，
去到讀完書出嚟做電腦嘢，開始從新認識Apple同Mac，然後學影相玩Mac版PS，
iPod出現，入手第一代Nano，iPhone一直都唔係我杯茶但係又買咗部MBP…

不知不覺間，雖然我唔算係果粉，但Steve Jobs嘅設計理念同思想都影響到我…

如果look back番Jobs嘅人生，的確佢唔算事事順意(有傳媒甚至整合咗佢嘅7大失敗作品)
不過佢選擇咗繼續向住自己嘅目標前進，直至成功為止。
最少，响佢嘅理念推動下，Pixars/iPod/iPhone等已經改變咗世界唔少…(包括我而家用緊嘅MBP都係)

正如Steve响大學畢業禮演講嘅一段話：

you can’t connect the dots looking forward; you can only connect them looking backwards.

這幾年Apple的成功，在開始的時候，或許會認為是一連串數碼革命，或是Steve本人的另一個黃金時代，
但，到呢個時候，looking backwards，會發現這應該是Steve在預計其生命即將完結時，
將自己嘅生命闊度進一步延展，然後留給世人最後的禮物。

或者，佢能夠一直向前，唔怕輸，係因為佢認為自己已經沒有可以輸的東西
(呢點煩請自己google一下Steve Jobs响2005年嘅Stanford畢業禮演講)
好可惜，呢個世界唔係好多人可以咁樣think positive然後以nothing to lose嘅態度去活著…

至於佢嘅名言”Stay Hungry, Stay Foolish“…sorry，呢點更難做到…最少我做唔到。

不過我認為有一句說話，佢比起任何人都可以更有力去講:”I get the job done”
沒有嘴砲，沒有煽情，而是用人生去execute，成就自己所想，盡量做好自己想做、可以做、需要做嘅事。.

56歲離世，是天妒英才?maybe
但相比世上不少同樣天才橫溢但30出頭便與世長辭嘅偉人(e.g. Mozart)，Steve嘅人生，已經不算短
At least佢用上佢無法控制嘅生命長度，盡量伸展屬於生命嘅闊度，
然後响自己最後嘅人生時段中，一再讓世界變得更美。

He get his jobs done. Now, he’s back to his origin.

哪管下一站是天堂，是極樂(Steve是佛教徒)，還是歸於塵土，佢嘅人世任務己經完成。

在世嘅我們，不一定要買Apple產品以作致敬/悼念，但最少，在心中一句：Rest In Peace.

一路好走。

雖然我唔反對一D講求視覺效果嘅電影拍成3D版本，不過我覺得3D電影未必係以下兩類人士杯茶：

• 

  一個人戴眼鏡+3D眼鏡就係咁樣...

  戴眼鏡人士
  雖然事實上戴住眼鏡睇3D電影其實都唔算好麻煩(以我睇1套3D電影嘅經驗)，
  不過都會感到唔舒服，因為個鼻托住兩副眼鏡其實真係幾重，
  而且好似廣告裏面所講嘅情節其實亦有機會發生…(只係冇咁誇張咁解啫)
  至於祼視3D電影嘛…
  要一個screen同時做到200幾個唔同角度(座位)都睇到3D效果難度太大喇
  我諗就算做到個result我諗都唔會太好囉…
• 單眼佬：
  如果一個人身體出現問題得番一隻眼睇到嘢，
  咁佢就已經唔駛睇任何3D電影，
  因為3D電影原理就係去欺騙兩隻眼睛嘅像差從而達致偽3D效果啊，
  得番一隻，點睇?

另外我亦都唔like一D戲有你冇理都拍做3D版本，
自己睇嗰套《變型金剛》已經唔算多3D鏡頭，
好在我係睇早場所以有平飛，如果唔係要我用過百銀睇佢我諗我一定會要求回水…

至於3D廢片中嘅經典應該都係當年由人人想睇去到後來連傻強都要粗口問候嘅《3D肉蒲團》，
好明顯3D電影當時淪為製片商呃錢嘅工具，以為咩都3D就掂…

結果呢?唔夠兩年就打回原形，似乎觀眾開始意識到荷包嗰張紅衫魚，
唔係用嚟入戲院睇一套冇露點亮點嘅3D電影，希望電影商亦都開始醒覺，真正賣座嘅電影，重點係內容，唔係3D啊!
(好內容亦正是我非常想睇响台灣超賣座嘅《那些年》嘅其一原因啊…快D到10/20啦…)

延伸閱讀：

3D電影利潤大跌，2D電影還是觀眾的最愛 | 科新聞 ＠ 癮科技