唔想公開既秘密，不為人知既過去，你有，我有，邊個都有，
响呢排藝人被爆結婚事件成為成中熱話之際，
用$300去睇呢套關於秘密既《聖荷西謀殺案》，
可謂perfect match…(雖然，貴了一點)
先講講劇情大概，倆口子身處外國郊區木屋，一日朋友大駕光臨，
本來應該冇乜特別，但背後既種種問題逐漸浮面，最後…
整個故事既重心係「秘密」，或者該說是…一啲唔想浮面既過去，
故事中，倆口子為咗守住一個不為人知既過去，機關算盡，步步為營，
但守得了秘密，唔代表倆口子就會快樂，尤其是，兩者缺乏溝通既時候。
二人都希望可以正常地社交，認識更多既人，唔再困响象徵「秘密」既屋內，
結果，客人來了，兩者同時對住呢個熟悉又陌生既第三身訢說自己既苦處，
面對二人既苦況，可惜客人都係啞子吃黃蓮，自己都有秘密無法宣洩，
同時，因為客人既存在同埋佢有意無意間，引發出一連串事件，
結果間屋就好似壓力煲咁，三個人困响裏面，最終，「爆煲」。
兩個女人既秘密都係關乎愛情，一個為愛人而不擇手段，機關算盡，
一個就無法面對過去種種指摘，打算重新開始，
而男的，雖然表面上係同樣為愛情而犠牲，但更深入既秘密，
應該係佢嗰種對事業既鬱鬱不得志而產生既殺機…
整個故事個人覺得寫得幾好，亦寫得幾完整，
可以用一個場景加埋六個人就造就一個社會縮影，
甚至連一啲國際問題亦加插在內…
(唔知編劇係咪故意嚟個兩岸三地統一，但總讓人會聯想到一些弦外之音…)
有趣既係，人性既醜惡可怕，有唔少劇都寫過，but，
原因一係就唔夠說服力(甚麼新仇舊恨/神經衰弱等)，
一係玩超現實現象(《盲流感》可謂經典)，
今次卻寫得合理而具說服力(最少個人認為合理先啦)..
另外劇本亦加入唔少本地/生活情節(例如港女/爆粗)，
除咗引發笑位外，同時亦令觀眾更易投入劇目裏面，
可惜既係普通話一段有點甩(只怪自己普通話真係好普通)，
幸好對話內容係乜應該唔太重要…
開場一段戲可謂驚喜，因為响未入晒場就開始做戲，應該都算係幾突破，
BTW，點解頭尾會唔同咗???原因未明，等打完個blog再search吓google先…
演員方面可謂完美，
劉雅麗演機關算盡同時希望可以重新生活既女強人可謂入木三分，
說話永遠是堅定，命令式，而且不留餘地，好有女王feel，
當演繹一個女子對未來既心願時，又可以一臉期盼，真係交足功課，
而鄧偉傑所演既Tang亦恰如其份，要沉默時沉默，要瘋狂時瘋狂，正，
彭秀慧…好似之前睇舞台劇見過佢，但…又好似冇喎，算，forget it，
今次演客人Sammy做得幾好，當然衣著方面係會加少少分(男人都係好色，我認)，
而且佢個角色全場個情緒起落都幾大(同Tang有得揮)，雖然個人認為Tang做得好啲，
但係佢都做得唔錯呀，得閒可以留意多啲佢出演既劇目…
另外三人雖然出得一場，但係都做得幾入戲，值得一讚…
場景應該係呢套戲最值得讚既地方，一開場個陽光普照look真係超eye catching，
再轉眼就變咗鎢絲燈warm house，比起《品香飯店》玩movable frame，
今次玩lighting，更考功夫，而且做得可謂very good，i’m lovin’ it
sound方面…都係嗰句，我係做CS，一早已經冇乜comment…
睇完套戲，會咁諗，人性，係咪真係人人都會咁黑暗?
係咪人人都會為求自己而不斷猜疑，甚至機關算盡、不擇手段?
仲有，旁人係咪真係咁鐘意爆人秘密?
大家有時候，係咪應該留一點空間給其他人呢?