王維基做亞視CEO，一開始我已經覺得奇奇怪怪，
本身都已經係電視媒體公司0既高高層(HKBN本身係under CTI，而HKBN又有BBTV)
走去本身「患重病」0既ATV做CEO，真係唔知佢做乜，
是否如報章所言「令ATV唔會變成中央台」，我倒不能肯定，
不過從陰謀論去諗，想ATV同BBTV合而為一亦可能係其中原因…
可惜，佢0向以十幾日所作出的言論又真係激0左少少，
其中「篤爆」亞姐結果造馬一事被眾人認為係佢被踢出局0既主因…
當然，D高層0向media面前一定會包裝到唔關事咁樣，
但事實上王生出呢招「公開自爆」，我認為係擺明同其他高層搞對抗…
亞姐今年首次搞「公投」，某程度上係gimmick多過實際用途，
「公投」唔通就一定公平咩?要「造票」比起用評審團仲容易啦，
而家又唔係選總統，事不關己己不勞心，羊群心理現象自然出現
網上又(可能)有人搞聲援搞告急，要拉高票數，piece of cake…
甚至乎有人玩0野開盤做0野營造爆冷賽果，結果?票后大熱倒灶，有眼睇
BTW，最少係對手未試過，食0左人頭啖湯，單係呢點已經夠noise，
何況「新官上任三把火」，唔搞D特別0野去「搶點」，
要0黎個鹹魚翻生，似乎唔係咁容易…
不過新官上任三把火，第一把火係亞姐搞公投，then?
第二把火由王維基自編自導自演，一大堆藝員同埋新聞部職員做綠葉，
女主角搵0黎落選亞姐，戲名「劉定堅」，真真假假炒埋一碟，
傳媒優先場現場睇，之後港人做開0既上網下載、Youtube等等隨時觀看，
吸引力直迫對手0既《豬肝補器》，追捧者可能多過睇黃金時段0既一家大細…
So?咪搞著前廣播局長去調查囉…
最後一把火，由兩大新高層單挑，一個話「接受對方請辭」，
一邊就突然搵代表作出表示「冇交過大信封」，
然後拋出一句「平常心」等大家慢慢估事情發展，
雖然唔夠《ガレリオ》同《Zodiac》咁懸疑緊張，
但係都已經令ATV同王維基0既曝光率推到高峰，
成效分分鐘好過之前0向巴士賣廣告硬硝數碼廣播…
如果你問我想唔想王維基quit，我會答你：想!
原因?好簡單，我用緊HKBN，但極少睇ATV(TVB都係)
母公司主席無端端走去人0地0既地頭收拾爛攤子，
到時東不成西不就搞到其他業務都做唔好，
咁我呢個簽0左兩年約0既user咪好大鑊?
還是乖乖搞掂本身0既電訊業務把啦，
要搞電視，成個網上數碼電視平台俾你慢慢玩…
最少，塊餅而家仲分緊，唔似傳統電視業務咁俾對手「熊抱」…
如果王生真係唔撈，又點解呢?我又用番陰謀論去諗，
王生一心諗住過去做CEO，乘機將BBTV融入ATV數碼廣播，
一招雙管齊下以期KO對手，但一入到去發現唔到佢主導，
所以就用兩星期時間表演「天下布武」以求削弱員工士氣，
引對手忍唔住要行「本能寺之變」殺之而後快，
但係咁樣一搞，ATV士氣只會仲差過之前，
而王生亦可以繼續做佢0既主席兼大股東，
唔駛好似網站公佈份PDF咁講「減少參與集團之日常管理」，
對自己而言可謂零損失，但係就令對手士氣受挫
(另一個角度去諗，BBTV同ATV去到數碼年代，都係競爭對手)
絕對係曠世高招，同佢當年出「殺價超人」一樣咁powerful…
Anyway，做也好唔做也好，總算未影響到我，吹完水，收工。
最後，有見自己文筆差，quote番少少資料俾大家參考…